CəBRAYIL RAYONUNA HəSR OLUNMUŞ XATİRə SİKKəSİ

2021-ci ildə Azərbaycan Respublikasının Silahlı Qüvvələrinin Ali Baş Komandanı İlham Əliyevin rəhbərliyi ilə 2020-ci ildə aparılmış 44 günlük Vətən Müharibəsində Azərbaycan ordusunun tarixi Zəfərinin ildönümü münasibətilə Mərkəzi Bank tərəfindən çəkisi 1 troy unsiyası və nominal dəyəri 5 AZN təşkil edən gümüş yubiley pul nişanı tədavülə buraxılmışdır.

Pul nişanı Böyük Britaniyanın “The Royal Mint” şirkətində beynəlxalq standartlara uyğun “Pruf” texnologiyası əsasında istehsal edilmişdir.

Xatirə sikkəsinin üzərində əsas dizayn elementləri kimi qədim memarlıq nümunəsi – Xudafərin körpüsü, rayonun əsas simvollarından biri kimi Azərbaycanın flora incisi olan qədim Şərq Çinarı və yarpaqları, “8 Noyabr” zəfər tarixi yazısı, Vətən Müharibəsinin qələbə rəmzinə çevrilmiş “Xarıbülbül”, eləcə də “Cəbrayıl” və “Qarabağ Azərbaycandır!” sözləri, arxa tərəfində isə Azərbaycan Respublikasının Dövlət Gerbi, 8 guşəli ulduzlar, “Azərbaycan Respublikası” sözləri və pul nişanının nominalı təsvir olunmuşdur.

Yubiley pul nişanı Azərbaycan Respublikası ərazisində nominal dəyəri ilə qanuni ödəniş vasitəsidir.